Irani ka përshpejtuar ndjeshëm eksportet e naftës, ndërsa tensionet në Gjirin Persik vijojnë të rriten dhe presidenti amerikan Donald Trump ka paralajmëruar mundësinë e rivendosjes së një bllokade detare të udhëhequr nga Shtetet e Bashkuara.
Sipas kompanisë së monitorimit të transportit detar TankerTrackers, vetëm gjatë një nate Irani eksportoi rreth 10 milionë fuçi naftë bruto dhe karburante, një rritje e konsiderueshme krahasuar me ritmet e javëve të fundit. Ndërkohë, të dhënat e Windward Intelligence tregojnë se gjatë tre javëve të fundit vendi kishte eksportuar rreth 60 milionë fuçi.
Përshkallëzimi i tensioneve në rajon ka ndikuar edhe në trafikun detar. Sipas platformës MarineTraffic, vetëm 25 anije cisternë kaluan të mërkurën përmes Ngushticës së Hormuzit, krahasuar me 49 një ditë më parë. Shumë kompani transporti kanë pezulluar përkohësisht lundrimet nga frika se anijet mund të mbeten të bllokuara në zonë.
Pjesa më e madhe e anijeve që kaluan përmes ngushticës lëvizën në drejtimin perëndim-lindje, duke dalë nga Gjiri Persik. Ndërkohë, përveç Emirateve të Bashkuara Arabe, të cilat kanë eksportuar deri në 65 milionë fuçi pas rihapjes së ngushticës, Irani ka tejkaluar eksportet e shumicës së vendeve të tjera prodhuese të naftës në rajon.
Eksportet e naftës mbeten burimi kryesor i të ardhurave për ekonominë iraniane, pasi rreth gjysma e të ardhurave shtetërore sigurohen nga shitja e saj, duke e bërë këtë sektor vendimtar për rimëkëmbjen ekonomike pas konfliktit.
(A2 Televizion)
A2 CNN Livestream
MUND TE LEXONI GJITHASHTU
