Pesë persona, katër gra dhe një burrë, kanë humbur jetën si pasojë e një sulmi me armë zjarri në një qendër mirëqenieje për të rinj në qytetin Stade, në Gjermaninë veriore.
Sipas policisë, disa persona të tjerë kanë mbetur të plagosur, ndërsa autoritetet kanë arrestuar dy persona, mes tyre edhe të dyshuarin kryesor për të shtënat. Zyrtarët kanë bërë të ditur se nuk ekziston më rrezik për publikun.
Mediat gjermane raportojnë se të pesë viktimat ishin të rritur. Në momentin e sulmit, në objekt ndodheshin gjithashtu gra dhe fëmijë, por deri tani nuk ka raportime se fëmijët kanë humbur jetën.
Ngjarja ndodhi rreth orës 14:15 me orën lokale në qendrën e mirëqenies për të rinj, e cila ndodhet në rrugën Dankersstrasse. Policia konfirmoi se pesë persona u qëlluan për vdekje, ndërsa të tjerë pësuan lëndime.
Forca të shumta policore dhe ekipe të emergjencës mbërritën menjëherë në vendngjarje, ndërsa autoritetet u bënë thirrje qytetarëve të shmangin zonën, shkruan A2CNN.
Sipas transmetuesve gjermanë ZDF dhe RTL, fëmijët e një çerdheje pranë vendit të ngjarjes u mbajtën të sigurt brenda ndërtesës gjatë incidentit, ndërsa më pas u morën nga prindërit e tyre.
Motivi i sulmit mbetet ende i paqartë dhe hetimet po vazhdojnë.
Qyteti Stade, i cili ndodhet rreth 30 kilometra në perëndim të Hamburgut, ka një popullsi prej rreth 50 mijë banorësh.
(A2 Televizion)
A2 CNN Livestream
MUND TE LEXONI GJITHASHTU
