Zelensky letër të hapur Putinit, propozon takim ballë për ballë me për t'i dhënë fund luftës

Presidenti ukrainas Volodymyr Zelensky i bëri thirrje presidentit rus Vladimir Putin për një takim ballë për ballë midis tyre në një përpjekje për t’i dhënë fund luftës. Në një letër të hapur të postuar ndërsa udhëheqësi rus po fliste me median në Forumin Ekonomik Ndërkombëtar të Shën Petersburgut, Zelensky theksoi se paqja nuk duhet të presë derisa SHBA-ja të kthejë vëmendjen nga Irani në luftën Ukrainë-Rusi.

“Ne shohim që Shtetet e Bashkuara janë plotësisht të përqendruara në çështjen e Iranit dhe do të ishte gabim të prisnim thjesht derisa lufta në Evropë të rikthehej në qendër të vëmendjes së tyre. Ukraina propozon përfundimin e kësaj lufte përmes një angazhimi të drejtpërdrejtë midis nesh dhe jush”, tha Zelensky, shkruan A2 CNN.

Ai gjithashtu bëri thirrje për një armëpushim të plotë për kohëzgjatjen e negociatave të propozuara, të cilin Putin e përjashtoi më herët të enjten.

“Unë po propozoj një takim, që të zhvillohet në një vend të tretë dhe se duhet të caktohet një datë e qartë. Një përpjekje për të vendosur heshtje të vërtetë është mënyra më e mirë për të filluar të flasim me njëri-tjetrin", vijoi ai, përcjell A2 CNN.

Udhëheqësi ukrainas tha se Putini shtyn “rregullisht” afatet për të pushtuar rajonet ukrainase, konkretisht Donetskun.

“Dhe nuk do ta kapësh as këtë vit”, tha ai. “Të gjithë mund të shohim se rusët po ndihen më pak rehat me këtë realitet, me faktin se lufta po sjell gjithnjë e më shumë pasoja negative për Rusinë”, shkroi Zelensky. “Atyre nuk u pëlqen fakti që nuk ka fund në horizont për luftën tuaj.”

Ndërkohë në Shën Petersburg, Putin tha se propozimet e bëra nga Presidenti i SHBA-së Donald Trump për t'i dhënë fund luftës mund të "jenë baza" për marrëveshje paqeje, por do të kërkonin kompromis nga të dy vendet, raporton A2 CNN.

“Në përgjithësi ramë dakord për këto kompromise. Thjesht duhet ta bindim palën ukrainase për këtë, dhe kaq”, tha ai. “Por në përgjithësi, besoj se ato mund të jenë shumë mirë baza për marrëveshje midis Rusisë dhe Ukrainës dhe mund t’i japin fund këtij konflikti.”

Putini sugjeroi që, meqenëse Trump ishte i zënë me Iranin, BE-ja mund ta bindte Zelensky-n të dorëzonte territorin.

Presidenti i SHBA-së, Donald Trump, tha të enjten se mendonte se “do të ishte shumë mirë” nëse të dy udhëheqësit do të takoheshin. (A2 Televizion)