Kryeministri izraelit Benjamin Netanyahu do të takohet këtë të martë me presidentin amerikan Donald Trump në Shtëpinë e Bardhë, në atë që shihet si një mundësi për të zbutur tensionet e krijuara së fundmi në marrëdhëniet mes të dyve.
Takimi i rëndësishëm, që mund të ndikojë në rrjedhën e konfliktit me Iranin, vjen teksa të dy liderët përballen me presione të forta politike në vendet e tyre, shkruan A2 CNN.
Në fokus të bisedimeve do të jenë programi bërthamor i Iranit, situata në Gaza dhe Liban, si edhe zgjerimi i Marrëveshjeve të Abrahamit. Netanyahu synon t'i paraqesë Trumpit informacione të reja të inteligjencës izraelite mbi aktivitetet bërthamore të Teheranit, ndërsa presidenti amerikan kërkon një zgjidhje që shmang përshkallëzimin e mëtejshëm ushtarak.
Megjithëse Trump deklaroi se ka vetëm "disa dallime" me Netanyahun për Iranin, mediat izraelite raportojnë se marrëdhëniet mes tyre janë ftohur muajt e fundit. Sipas analistëve, SHBA-ja ka marrë drejtimin e vendimeve strategjike, duke e lënë Izraelin në një rol më të kufizuar.
Takimi pritet të trajtojë edhe zhvillimet në Liban, ku Izraeli ka rënë dakord të lejojë ushtrinë libaneze të vendoset në disa zona të jugut, si dhe situatën në Gaza, ku po shqyrtohet vendosja e një force ndërkombëtare stabilizuese në qytetin e Rafahut.
Ndërkohë, mbështetja për Izraelin në Shtetet e Bashkuara ka rënë ndjeshëm, veçanërisht për shkak të luftës në Gaza, duke e bërë këtë takim edhe më të rëndësishëm për të ardhmen e bashkëpunimit mes dy aleatëve.
(A2 Televizion)
A2 CNN Livestream
MUND TE LEXONI GJITHASHTU
