“Çmenduri absolute”, debat nëse duhet shembur apo jo bunkeri i Hitlerit në Berlin  

Në Berlin ka plane për të shembur një nga mbetjet e fundit të qendrës së pushtetit të Adolf Hitlerit. Pothuajse asgjë nuk ka mbetur nga kancelaria e udhëheqësit nazist në Berlinin qendror, përveç një bunkeri.

Por tani ka plane për ta shembur atë për të ndërtuar apartamente dhe zyra.

Kompleksi i Kancelarisë së Rajhut, i ndërtuar nga arkitekti i preferuar i Hitlerit, Albert Speer, u dëmtua rëndë në fund të Luftës së Dytë Botërore dhe më pas u shemb me urdhër të forcave sovjetike në vitin 1949. Megjithatë pjesë të tij janë ende të dukshme.

Senatori i Strehimit i Berlinit, Christian Gaebler (SPD), beson se është koha që struktura të zhduket.

"Ne nuk po i pengojmë zhvillimet e reja të banesave vetëm për të ruajtur një bunker që mund të bëhet edhe një vend pelegrinazhi", i tha ai gazetës BZ. Por të tjerë thonë se bunkeri duhet të ruhet.

Dietmar Arnold, kryetar i Shoqatës së Botëve të Nëndheshme të Berlinit, i tha BBC-së se do të ishte "çmenduri absolute" shembja e bunkerit. "Është një vend i autorëve të krimit", tha ai. "Ishte qendra e pushtetit të Gjermanisë naziste, Kancelaria e Re e Rajhut e Hitlerit, dhe këto janë mbetjet e fundit."

Ai dëshiron të bashkëpunojë me Muzeun e Holokaustit për ta shndërruar vendin në një muze dhe vend përkujtimor, me një ekspozitë rreth fundit të luftës. "Kaq shumë histori është shkatërruar këtu në Gjermani, si historia komuniste ashtu edhe historia naziste. Nuk mund të vazhdojmë ta bëjmë këtë."

Arnoldi shkoi për herë të fundit në bunker në vitin 2007, kur tha se ishte në gjendje shumë të mirë. Ai tha se ky nuk ishte bunkeri më i famshëm, ku Hitleri dhe Eva Braun kryen vetëvrasje dhe që ndodhet rreth 120 metra në veri.

Në vend të kësaj, kjo u përdor nga njerëz që punonin në Kancelarinë e Rajhut. Në fund të luftës, brenda strukturës u ngrit një spital. Sipas Arnold, 1,200 metra katrorë të kompleksit të bunkerëve mbeten të paprekura; muret dhe tavani janë secili 1.7 metra të trashë. Ai beson se do të ishte e mundur të ndërtohej sipër tyre pa e shembur të gjithë bunkerin.

  (A2 Televizion)